ട്വന്റി20 മാതൃകയിലൂടെ വിഷമില്ലാത്ത മീൻ കഴിക്കാം…

കഴിഞ്ഞ ഒരു ആഴ്ചയായി മലയാളികളുടെ സംസാര വിഷയം ഫോർമാലിൻ ചേർത്ത മീനിനെ പറ്റിയാണ്. വിഷം കലർന്ന ടൺ കണക്കിന് മീൻ പിടിച്ചെടുത്തത്തോട്കൂടി ഇനി എങ്ങനെ മീൻ കഴിക്കുമെന്ന ആശങ്കയിലാണ് കേരളക്കര മുഴുവൻ. എന്നാൽ ഒരുമയുണ്ടെങ്കിൽ വിഷമില്ലാത്ത നല്ല അടിപൊളി മീൻ കഴിക്കാമെന്ന് തെളിയിച്ചിരിക്കുകയാണ് കിഴക്കമ്പലത്തുകാർ. ട്വന്റി 20 എന്ന ആശയം നാട്ടിൽ പ്രവർത്തികമാക്കി വിജയിച്ച ഈ ഗ്രാമനിവാസികൾ മത്സ്യഗ്രാമം പദ്ധതിയിലൂടെ ഇപ്പോൾ കേരളത്തിന് മുഴുവൻ മാതൃകയായിരിക്കുകയാണ്.

മത്സ്യഗ്രാമം എന്ന ജൈവമത്സ്യ കൃഷിയിലൂടെ നൂറുമേനി വിളവെടുത്തിരിക്കുകയാണ് കിഴക്കമ്പലം ഗ്രാമം. പാട്ടത്തിനെടുത്ത സ്ഥലത്ത് പിരാന, തിലോപ്പി, കറുവുപ്പ്, കട്ടല തുടങ്ങിയ മീനുകളെയാണ് കൃഷി ചെയ്തിരിക്കുന്നത്. 2000 കിലോഗ്രാം മത്സ്യങ്ങളാണ് ആദ്യ വിളവെടുപ്പില്‍ തന്നെ ലഭിച്ചത്. നല്ല രീതിയിൽ ജല സാന്നിധ്യമുള്ള സ്ഥലത്ത് 4 അടിയോളം വെള്ളം ഉണ്ടാകുന്ന രീതിയിലാണ് കുളം നിർമ്മിച്ചത്. ഇതിലേക്ക് മത്സ്യകുഞ്ഞുങ്ങളെ സൗജന്യമായി നൽകിയിരുന്നു. മഴക്കാലത്ത് കുളത്തിലേക്ക് വെള്ളം ഒഴുകാതിരിക്കാൻ വരമ്പ് കെട്ടി തിരിക്കുകയും ചെയ്തിരുന്നു.

മറ്റു മത്സ്യങ്ങളെ കൂടാതെ രോഹു, മൃഗാള്‍, സില്‍വര്‍ കാര്‍പ്പ്, കോമണ്‍ കാര്‍പ്പ്, ഗ്രാസ് കാര്‍പ്പ്, കരിമീന്‍, ചെമ്മീന്‍, കൊഞ്ച് എന്നിവയും ഇവിടെ കൃഷി ചെയ്യുന്നുണ്ട്. വിളവെടുക്കുന്ന മീനെല്ലാം ട്വന്റി 20 ഭഷ്യ സുരക്ഷാ മാർക്കറ്റിലൂടെ പുറമെയുള്ള വിപണി വിലയേക്കാൾ പകുതി വിലയിലാണ് വില്പന നടത്തുന്നത്. ട്വന്റി20 ചീഫ് കോഡിനേറ്റര്‍ സാബു എം ജേക്കബാണ് മത്സ്യ കൃഷിയുടെ ആദ്യ വിളവെടുപ്പ് നിര്‍വഹിച്ചത്. മീനില്ലാതെ ചോറുണ്ണാൻ കഴിയാത്ത മലയാളികൾക്ക് പുത്തൻ ആശയം ഒരുക്കിയിരിക്കുകയാണ് ട്വന്റി 20. കുടുംബശ്രീ വഴിയോ റെസിഡന്റ്‌സ് അസോസിയേഷനുകൾ വഴിയോ ഈ പദ്ധതി നടപ്പിലാക്കാൻ നിങ്ങൾക്കും സാധിക്കും.