നിശബ്ദതാഴ്‌വരയുടെ കാവല്‍ക്കാരന്‍

നിശബ്ദതാഴ്‌വരയുടെ കാവല്‍ക്കാരന്‍

കാട് മ്മളെ ചെലപ്പോ കറക്കും, പക്ഷേ ഒരിക്കലും ചതിക്കില്ല. ”

തൂക്കുപാലത്തിന്റെ ഞരക്കത്തിനും മീതെ മാരിയുടെ വാക്കുകള്‍ക്കു വന്യതയുണ്ടായിരുന്നോ? താഴെ, ആ വാക്കുകള്‍ ശരിവച്ച് പതിവ്രതയായി കുന്തിപ്പുഴ ഒഴുകുന്നു. ഉത്ഭവസ്ഥാനത്തു നിന്നു മനുഷ്യസ്പര്‍ശമില്ലാത്ത ഇരുപത്തിമൂന്നു കിലോമീറ്ററുകള്‍ പിന്നിട്ടിരിക്കുന്ന ഈ പുഴ, നിശബ്ദ താഴ്‌വരയുടെ താളം. അതിരറിയാത്ത ആരണ്യകത്തിന്റെ നടുവില്‍ നിന്നു മാരി, പറഞ്ഞു തുടങ്ങിയതു കാടിനെക്കുറിച്ച്. പറയുന്നതെല്ലാം കാടിനെക്കുറിച്ച്. കൈപിടിച്ചു കൊണ്ടു പോകുന്നതു കാടിന്റെ കൈവഴികളിലേക്ക്. അറിയാത്ത കാട്ടറിവുകളിലേക്ക്. ചതിക്കാത്ത കാടിന്റെ നേരുകളിലേക്ക്. സൈലന്റ് വാലിയുടെ കാവല്‍ക്കാരില്‍ ഒരാളായ മാരിയില്‍ നിന്ന് അനുഭവങ്ങള്‍ പൊഴിഞ്ഞു കൊണ്ടേയിരുന്നു.

 

സൈരന്ധ്രിയിലെ ക്യാംപ് ഹൗസില്‍ നിന്നു താഴെ കുന്തിപ്പുഴയുടെ തീരത്തേക്കു നടക്കാം. കൂടെ മാരിയുണ്ട്. സമയം ഉച്ചയ്ക്കു മൂന്നരയോടടുക്കുന്നതേയുള്ളൂ. പക്ഷേ, കാട്ടില്‍ നിഴല്‍ വീണു തുടങ്ങി. കരിയിലകള്‍ മൂടിയ വഴിത്താരകളിലേക്ക് തണുപ്പ് അരിച്ചിറങ്ങുന്നു. രണ്ടു കിലോമീറ്ററോളം കാല്‍നടയായി കാട്ടുവഴിയുടെ ഇറക്കത്തിലേക്ക്. ഒരു ചെറിയ പൂവിന്റെ കഥയാണ് മാരി പറഞ്ഞു തുടങ്ങിയത്. ഔഷധത്തിന്റെ ശക്തി, കാട്ടുചെടികളുടെ കുസൃതി, വഴികളിലെ മൃഗസാന്നിധ്യത്തിന്റെ സാധ്യത… വര്‍ത്തമാനങ്ങള്‍ കാടുകയറിക്കൊണ്ടിരുന്നു.

 

 

കാട്ടിലെ കുഞ്ഞു പൂവുകള്‍ക്കുപോലും കഥയുണ്ട്. മാരിക്ക് കഥയില്ലേ? ആ കഥ ഇങ്ങനെ തുടങ്ങാം. മുഡുഗ ഗോത്രത്തില്‍പ്പെട്ട ലച്ചിയപ്പന്റെയും കുറുമ്പിയുടെയും മകനാണു മാരി. സൈലന്റ് വാലിയുടെ കാടു കാത്തിരുന്ന അച്ഛന്റെ മകന്‍. സൈലന്റ് വാലിയുടെ സംരക്ഷകനായിരുന്നു ലച്ചിയപ്പന്‍. താഴ്‌വരയ്ക്കു നിശബ്ദത മാത്രമല്ല, നിഗൂഢതകളും ഉണ്ടായിരുന്ന കാലത്ത് ഗവേഷകരേയും സഞ്ചാരികളേയും കാട്ടിലേക്കു നയിച്ചത് ലച്ചിയപ്പനായിരുന്നു. ഒപ്പം, നിത്യഹരിത വനത്തിന്റെ സമ്പത്ത് നഷ്ടമാകുന്നില്ലെന്നുറപ്പിച്ചു ലച്ചിയപ്പന്‍. കാടിന്റെ കാവല്‍ക്കാരന്റെ മകനും ആ വഴി പിന്തുടര്‍ന്നു. അച്ഛന്‍ നടന്ന വനവഴികളിലൂടെ മാരിയും നടന്നു. മാസാവസാന ശമ്പളത്തിന്റേയും അവധിയുടെയും കണക്കുകളില്‍ കുടുങ്ങാതെ, വാച്ചറെന്ന ഔദ്യോഗിക വിശേഷണത്തിന്റെ തണലില്‍ ഒതുങ്ങാതെ കാടിനെ കാത്തു സൂക്ഷിക്കുന്നു. കൊടുങ്കാടിന്റെ ഇരുളും വെളിച്ചവും താണ്ടി നടക്കുന്നു.

 

 

 

 

മാരിയറിയാത്ത കാടില്ല

മാരിയറിയാതെ കാടിന് ഒരു രഹസ്യവുമില്ല. കാലങ്ങളുടെ സൗഹൃദം. കാട്ടിലൂടെ നടക്കുകയല്ല മാരി. കാടിനൊപ്പം നടക്കുകയാണ്. പതിനഞ്ചാം വയസില്‍ ഈ നിശബ്ദതയിലേക്കെത്തി. കാട്ടുതീ വരുമ്പോള്‍ ലക്ഷ്മണരേഖ ചമയ്ക്കലായിരുന്നു ആദ്യ ദൗത്യം. ഫയര്‍ലൈന്‍ ഒരുക്കല്‍. പിന്നീടു വാച്ചറായി. ഒരു ദിവസം ഇരുപതു കിലോമീറ്ററിലധികം കാട്ടിലൂടെ നടക്കുമായിരുന്നു. ചിലപ്പോള്‍ കൊടുങ്കാട്ടിലൂടെ ഒറ്റയ്ക്ക്. സൂര്യപ്രകാശമെത്താത്ത പകലുകളും, ഇരുളിന്റെ തീവ്രതയറിയിക്കുന്ന ദൂരങ്ങളും പിന്നിടും. റിസര്‍ച്ചിനെത്തുന്നവര്‍ ആശ്രയിക്കുന്നതും മാരിയെ. കാരണം, മാരി കാടിനെ അറിയുന്നു, മാരിയെ കാട് അറിയുന്നു.

 

 

മാരിയുടെ വാക്കുകളില്‍ വന്യാനുഭവങ്ങള്‍ കാടുകയറി. രണ്ടു മൂന്നു കൊല്ലങ്ങള്‍ക്കു മുമ്പ് ഒരു സഞ്ചാരം. സംഘത്തില്‍ ഏഴു പേര്‍. കൊടുങ്കാടിന്റെ പേരറിയാ തിരുവുകളില്‍ എവിടെയോ എത്തിയപ്പോള്‍ ഒരു കൊമ്പന്‍. എല്ലാവരും ഓടി. മാരി ഒരു മരച്ചുവട്ടില്‍, ശ്വാസമടക്കിപ്പിടിച്ച് കുത്തിയിരുന്നു. മരത്തിനപ്പുറത്തു വന്ന് കൊമ്പന്‍ മനുഷ്യന്റെ മണം പിടിച്ചു.

 

 

കുറച്ചുദൂരത്തു നിന്നു മറ്റൊരാള്‍, ആനയുടെ ചെയ്തികള്‍ മാരിയോട് വിളിച്ചു പറയുന്നുണ്ടായിരുന്നു. കുറേനേരം കഴിഞ്ഞു. കൊമ്പന്‍ പിന്മാറിയെന്നു തോന്നിയപ്പോള്‍ എഴുന്നേറ്റു. ആനച്ചാലിലൂടെ മാരിയും സംഘവും നീങ്ങി. കുറച്ചു ദൂരം മുന്നോട്ടു പോയിക്കാണും. ഒരു വളവില്‍ കാത്തുനില്‍പ്പുണ്ടായിരുന്നു ആ കൊമ്പന്‍. അന്നു കൊമ്പന്‍ മാരിയെ കൊക്കയില്‍ ചാടിച്ചു…

 

 

പൂച്ചിപ്പാറ വനമേഖല. മാരിയുടെ പതിവുസഞ്ചാരം. കുറച്ചുദൂരം ചെന്നപ്പോള്‍ മുന്നില്‍ ചെന്നായയും രണ്ടു കുഞ്ഞുങ്ങളും. കീ കീ എന്നു കരഞ്ഞു കളിക്കുന്ന ഭംഗിയുള്ള കുഞ്ഞുങ്ങളെ കണ്ടപ്പോള്‍ മാരിക്കു കൗതുകം, വാത്സല്യം. ഒന്നു കൊഞ്ചിക്കാമെന്നു കരുതി മാരി ഒരു കുഞ്ഞിനെ കൈയിലെടുത്തു തലോടി. അമ്മച്ചെന്നായ അലറിക്കൊണ്ട് ഓടി വന്നു. കുഞ്ഞിനെ താഴെവച്ച് മാരി ഓടി. ഒരു മരത്തില്‍ കയറി. ചെന്നായ വിടുന്ന മട്ടില്ല. മാരിയെ താഴെയിറക്കാനായി ചെന്നായയുടെ ശ്രമം. ഒടുവില്‍, കൂക്കിവിളിച്ചും അലറിക്കരഞ്ഞും ചെന്നായയെ ഓടിച്ചു. എങ്കിലും മാരി പറയും, സൈലന്റ് വാലിയിലെ മൃഗങ്ങളെ വന്യമൃഗങ്ങള്‍ എന്നു വിളിക്കരുത്. ഇങ്ങോട്ട് അറ്റാക്ക് ചെയ്തിട്ടില്ല. കരടി, കടുവ, പുള്ളിപ്പുലി, പാമ്പുകള്‍…. അങ്ങനെ മൃഗങ്ങളേറെ മാരിയുടെ മുന്നില്‍ വന്നിട്ടുണ്ട്. കുന്തിപ്പുഴയിലേക്കു നടക്കുന്നതിനിടെ, ഭയത്തിന്റെ വിത്തു പാകി മാരി ഈറ്റക്കാടുകള്‍ ചൂണ്ടിപ്പറഞ്ഞു, രാജവെമ്പാലകളുടെ കേന്ദ്രമാണിത്. കാട്ടു പാതയില്‍ ഒരു മിഠായിക്കടലാസിന്റെ, പ്ലാസ്റ്റിക്കിന്റെ കഷണം പോലും പാടില്ലെന്നു വാശിപിടിക്കുന്നു മാരി.

 

 

Spread the love
Previous കടബാധ്യത: കഫേ കോഫി ഡേ ബാംഗ്ലൂര്‍ ടെക് പാര്‍ക്ക് വിറ്റു
Next ഓട്ടോമൊബൈല്‍ മേഖലയിലെ മാന്ദ്യം; വകുപ്പുകള്‍ കാറുകള്‍ വാങ്ങണമെന്ന് കേന്ദ്രം

You might also like

SPECIAL STORY

സതിയുടെ സ്വന്തം അലോകി

ആരോഗ്യ പരിപാലനത്തിനെന്നപോലെതന്നെ സൗന്ദര്യ സംരക്ഷണത്തിനും ഇന്ന് മലയാളികള്‍ ഏറെ പ്രാധാന്യം നല്‍കിത്തുടങ്ങിയിരിക്കുന്നു. അതിനാല്‍ത്തന്നെ കോസ്മെറ്റിക്സ് ഷോപ്പുകളുടെയും ബ്യൂട്ടി ക്‌ളിനിക്കുകളുടേയും ബ്യൂട്ടി പാര്‍ലറുകളുടേയുമെല്ലാം എണ്ണം ദിനംപ്രതി വര്‍ധിച്ചുവരുകയാണ്. ചെറു സംരംഭകര്‍ മുതല്‍ മള്‍ട്ടി നാഷണല്‍ കമ്പനികള്‍ വരെ ഈ രംഗത്ത് ഇന്ന് മത്സരിക്കുന്നുണ്ട്.

Spread the love
SPECIAL STORY

കോക്കനട്ട് ക്രീം, കോക്കനട്ട് പൗഡര്‍ എന്നിവയ്ക്ക് സാധ്യകളേറെ

കറികള്‍, മില്‍ക്ക് ഷേക്ക്, ശീതള പാനീയങ്ങള്‍, ഐസ് കാന്‍ഡി, ഫ്രൂട്ട് സാലഡ് തുടങ്ങിയവയില്‍ ഉപയോഗിക്കുന്ന കോക്കനട്ട് ക്രീമിന് നല്ല ഡിമാന്‍ഡ് ഉണ്ട്. പ്രത്യേകിച്ചും ആഭ്യന്തര, ഗള്‍ഫ്, പശ്ചിമ ഏഷ്യന്‍ വിപണികളില്‍. ഡിപ്പാര്‍ട്ട്മെന്റ് സ്റ്റോര്‍, സൂപ്പര്‍ മാര്‍ക്കറ്റ്, ഹോട്ടല്‍, ബേക്കറി തുടങ്ങിയവയ്ക്ക് സപ്ലൈ

Spread the love
SPECIAL STORY

നൊസ്റ്റാള്‍ജിയ ഉണര്‍ത്തുന്ന ആദമിന്റെ ചായക്കട

നാട്ടിന്‍പുറത്തെ ചായക്കടകളിലെ ആവി പറക്കുന്ന പുട്ടും കടലയും, നീട്ടിപ്പിടിച്ചടിക്കുന്ന ചായയുടെ ശബ്ദവും, എണ്ണയില്‍ പൊരിച്ചെടുക്കുന്ന ഉണ്ടംപൊരിയുടെയും പഴം പൊരിയുടെയുമെല്ലാം കൊതിപ്പിക്കുന്ന മണവും അതോടൊപ്പം അവിടെ ഉണ്ടാകുന്ന കളിചിരികളും തര്‍ക്കങ്ങളും പുതിയ കാലത്തിന് അന്യമായിക്കൊണ്ടിരിക്കുകയാണ്. ഈ കാലഘട്ടത്തിലാണ് നാട്ടിന്‍പുറങ്ങളിലെ ചായക്കടയിലെ ഗൃഹാതുരത്വവും നന്മയും

Spread the love

0 Comments

No Comments Yet!

You can be first to comment this post!

Leave a Reply