ധനുഷ്-ടൊവീനോ ചിത്രം ‘മാരി 2’ വിന്റെ ട്രെയ്‌ലര്‍ പുറത്ത്

സിനിമാ പ്രേമികള്‍ പ്രത്യേകിച്ച് ടൊവീനോ ആരാധകര്‍ ആഘോഷമാക്കുകയാണ് ‘മാരി 2’ വിന്റെ ട്രെയ്‌ലര്‍. ബാലാജി മോഹന്‍ സംവിധാനം ചെയ്യുന്ന ധനുഷ് ചിത്രം മാരി 2ന്റെ ട്രെയ്‌ലര്‍ പുറത്തെത്തിയപ്പോള്‍ ടൈറ്റില്‍ റോളിലെത്തുന്ന ധനുഷിനൊപ്പം പ്രതിനായകനായെത്തുന്നത് ടൊവീനോയാണ്. നേരത്തേ തന്നെ ചിത്രത്തിലെ ടൊവീനോയുടെ ഗെറ്റപ്പ് പ്രേക്ഷകശ്രദ്ധ നേടിയിരുന്നു.  2.17 മിനിറ്റ് ദൈര്‍ഘ്യമുള്ള ട്രെയ്‌ലറില്‍ ധനുഷിനും ടൊവീനോയ്ക്കുമൊപ്പം സായ് പല്ലവിയും പ്രധാന കഥാപാത്രത്തെ അവതരിപ്പിക്കുന്നു.

2015ല്‍ പുറത്തിറങ്ങിയ ‘മാരി’യുടെ രണ്ടാംഭാഗമാണ് ‘മാരി 2’. വണ്ടര്‍ബാര്‍ ഫിലിംസിന്റെ ബാനറില്‍ ധനുഷ് തന്നെയാണ് നിര്‍മ്മാണം. വരലക്ഷ്മി ശരത്കുമാറും ചിത്രത്തിലുണ്ട്. യുവാന്‍ ശങ്കര്‍ രാജയാണ് സംഗീതം. ഡിസംബര്‍ 21നാണ് ‘മാരി 2’ തീയേറ്ററുകളിലെത്തുന്നത്.